Четириесетина ученици – гимназијалци од Шведска деновиве се во посета (возвратна) на своите врсници од охридската Гимназија. Професорот Љубомир Ралевски, швеѓанец со македонско потекло, е водич на групата која доаѓа од училиштето Норевор Сколар, од гратчето Еслов (Eslov) кое се наоѓа во јужниот дел од оваа скандинавска земја.


Професорот Ралевски од Шведска и директорот Машановиќ

„Во групата сме 40 деца и пет професори. Тука сме на покана од гимназијата „Климент Охридски“ и првите впечатоци се одлични.“ вели Ралевски. „Инаку јас сум по потекло од Битола, роден во Шведска и предавам математика и физика. Ова дружење помеѓу младите од Шведска и Македонија кое започна со посетата на охридската гимназија кај нас во Еслов ќе биде интересен спој помеѓу „резервираноста“ но и искреноста на Швeѓаните и темпераментноста и непосредноста на Македонците“ заклучи Ралевски.


Една недела ќе бидат во Охрид. Ученици од Еслов, Шведска

На денешното дружење во охридската гимназија, домаќините го претставија нашиот град и Гимназијата,  а на гостите им беше понудено традиционално македонско јадење. Швеѓaнчињата се тука до петок и за тоа време ќе ги посетат сите позначајни места во Охрид и околината.

Како и сите „северњаци“ најмногу им се допаѓа „убавото и сончево време“ бидејќи деновиве во ладната Шведска било – погодувате – ладно.

С. Костоски