Гардијан: Светските банки опстанаа поради парите на мафијашите

Лондонскиот весник „Гардијан“ тврди дека глобалниот финансиски систем во неодамнешната  економска криза во светот опстанал благодарение на парите од организираниот криминал, пренесува „Макфакс“.

„Водечките светски банки, на кои во сегашната економско-финансиска криза очајнички им беа потребни парите, посегнаа по парите на мафијата, па поголемиот дел од неверојатните 352 милијарди долари профит од трговијата со дрога во текот на тоа време е вклучен во глобалниот економски систем. Валканите пари на тој начин се испрани,“ тврди лондонскиот дневник.

Иако сево ова звучи неверојатно, продолжува весникот, сето тоа е признато уште минатата година од шефот на агенцијата на Обединетите Нации која се бори против трговијата со дрога и организиран криминал во светот.

Огромен дел од глобалната економија, по некои пресметки дури и една петтина, отпаѓа на организираниот криминал – трговијата со оружје, дрога и луѓе.