Проблемите, како случајот на гевгеличанката со двојно државјанство, Спаска Митрова, не треба да се преувеличуваат, вели евроамбасадорот Ерван Фуере. Тој смета дека со билатерални разговори на двете влади ова прашање може да се реши и не верува дека тоа треба да има европски контекст.
– Верувам дека со размена на информации и разговори помеѓу владите во Софија и Скопје ова прашање ќе се реши и ќе се надминат проблемите помеѓу двете држави, изјави денеска во Охрид, Ерван Фуере. Тој се сомнева дека зад случајот се крие некаква пропаганда, бидејќи како што рече, „Бугарија како и Грција и другите држави не искажаа никакви забелешки на визната либерализација“.
Одговарајќи на новинарско прашање, евроамбасадотот изрази загриженост во врска со најавите на Демократската партија на Албанците – ДПА за напуштање на Собранието во период кога се подготвува извештајот за напредокот на државата во Европската комисија.
-Ова воопшто не е добар развој, затоа што ДПА, како и сите партии е избрана од граѓаните да им служи во Парламентот, а не надвор. Веруваме дека загриженоста и проблемите на кои укажува ДПА најдобро ќе бидат разрешени во парламентот, а не надвор од него и затоа се надеваме дека раководството и членовите на ДПА нема да ја остварат заканата и партијата ќе остане во парламентот во кој кој е избрана, рече Фуере
Во пресрет на одбележувањето на 8-годишнината од Охридскиот рамковен договор, евроамбасадорот упати порака до владата и сите политички партии да направат се што е во нивна моќ да се осигура максимална имплементација на Охридскиот договор, во чиј дух, смета Фуере, треба са разрешат проблемите со образованието во Струга и со употребата на јазиците на заедниците.
