Евроамбасадорот Ерван Фуере како недоразбирање го оцени фактот што македонскиот јазик во годинешниот извештај на Европската Комисија за напредокот на земјата е наречен државен јазик.
Тој, претставувајќи го извештајот на комисиска расправа во Собранието, рече дека во однос на ова прашање нема промена во политиката на Брисел и се извини пред пратениците.
„Ние се извинуваме за било какво недоразбирање. Сакам да ве уверам дека апсолутно нема промена на политиката на Брисел. Доколку ме прашаат кој е јазикот на земјата, јас ќе кажам македонски јазик. Верувам дека ова недоразбирање е чисто недоразбирање. Ќе побарам од сите вас да имате предвид дека ние ги следиме упатствата на Обединетите Нации, кога станува збор за ова прашање“, изјави Фуере.
Извинувањето на Фуере следува по средбата одржана утрово со претседателот Ѓорге Иванов, кој побарал објаснување зошто во годишниот извештај не е искористена редовната пракса за употреба на терминот „македонски“ за именување на службениот јазик во земјата.
извор: „Макфакс“
