Четворочлено француско семејство одлучило да направи туристичка прошетка во земјава, но на невообичаен начин. Семејството од Франција, сопружници и нивните две деца, допатуваа во нашите краишта на велосипеди.
Ниту велосипедите на француските туристи не беа обични. Таткото, на својот велосипед прикачил приколка на две тркала “кабриолет”, каде што е сместено девојчето, додека мајката на својот велосипед има прикачено друг велосипед-тип “Пони” за деца, кој со леснотија го шлепа синот, опремен со зелена маица и шлем на главата, како што предвидуваат сообраќајните одредби.
Пристигнувањето на веселото семејство во Струга, на мостот на реката Дрим, го забележа објективот на авторот на оваа фото-вест, кој и самиот беше уловен од објективот на главата на француската фамилија и настана меѓусебно фотографирање.
Мехмет Латифи
