Фрај: Пази, смени, лево, десно!

Долго „Рибарите“, навивачите на кошаркарскиот прволигаш Амак-СП, чекаа нивниот миленик, Американецот Џарид Фрај да влезе во ритам. Најдобриот стрелец од минатата сезона мака мачеше со серијата повреди, по што беше под нивото на кое охриѓани навикнаа да ја гледаат „петката“. Но сега Фрај е најкорисен играч (МВП) на 1. коло од Суперлигата (19 поени, 8 скока и 5 украдени топки 2 асистенции и една блокада).

– Во првиот дел од сезоната влечев повреда на зглобот, поради што бев бавен. Сега сум ОК. Пред мечот со Пелистер, тренерот ми рече да играм слободно и јас го искористив моментот. За разлика од лани, оваа екипа е поквалитетна, минатата сезона јас бев тој што требаше да го заврши речиси секој напад, што сега не е така. Затоа моите статистички бројки се послаби во однос на лани, но јас сум тука да ги извршувам барањата на тренерот и сè додека тој е задоволен од мојата игра и јас сум задоволен – вели Џарид.

Во финишот на регуларниот дел „Езерџиите“ претрпеа три порази, со што ја расипаа идиличната слика за тимот.

– Претрпевме неколку порази во серија во натпревари што можевме да ги добиеме. Сè уште ја градиме „хемијата“ во нашиот тим и очекувам во овој дел од првенството да го покажеме вистинското лице – вели тој.

За Фрај ова е втора година во Охрид. Се навикнал на начинот на живеење, но најголем проблем вели дека му претставуваат студеното време и условите во кои се играат натпреварите во зимскиот период.

– Тешко е кога мора да дуваш во рацете за да ги загрееш дланките – вели Американецот.

Џарид научил и неколку македонски збора, кои му помагаат да се снајде на терен. „Пази, смени, лево и десно“ се зборовите што најчесто се употребуваат во баскетот, кои се нови во вокабуларот на Американецот.