Со извонредна изведба на македонските ора и песни, ансамбол за народни песни и игри „Танец“ вчеравечер ја воодушеви публиката на летната сцена Долни сарај, во рамки на свеченото отворање на 51. издание на Балканскиот фестивал на народни песни и игри. Љубителите на фолклорот не го криеа своето задовоството од беспрекорните изведби на професионалните играорци и многупати ги наградија со громогласни и стоечки аплаузи.
Претседателот на Собранието на Република Македонија, Трајко Велјаноски, кој е покровител на оваа манифестацијата, во своето обраќање пред присутните, рече дека посебно го радува тоа што Балканскиот фестивал станува препознатлив не само во Охрид и Македонија, туку и надвор од нашата држава.
-Ова е фестивал кој заслужува и добива особено внимание и почит. Македонскиот народ низ својата историја, низ различни услови и околности настојувал, истрајувал и успевал да ги сочува својот фолклор, народната игра и песна, обичаите и традицијата и истите да ги пренесе на новите генерации. Како држава, но и како поединци треба да останеме на тој пат на истрајност во зачувувањето и развивањето на фолклорот, традицијата и културните обележја кои не потврдуваат како дел од европската култура и како дел од целокупното цивилизациско и културно наследство, рече Велјаноски.
Помеѓу многубројната публика, свеченото отворање на фестивалот го проследија и десетина гости од индиската делегација на Субрати Рој, кои деновиве престојуваат во Охрид.
Вечерва на фестивалот ќе настапат КУД ,,Иван Горан Коваќевиќ” од Загреб, Хрватска и ансамблот ,,Дом на полифонијата” од Тирана, Албанија. Третата фестивалска вечер, на 8-ми јули е резервирана за ансамблот ,,Измир’’ од Турција и ансамблот ,,Дримкол’’ од Вевчани. На 9-ти јули, понеделник ќе настапат ансамблите ,,Варна’’ од Бугарија и ,,Ваграм ‘’од Австрија. Публиката на 10-ти јули ќе може да ги проследи настапите на ансамблите ,,Подегродзие’’ од Полска и ,,Џидо’’ до Србија. Честа да го затворат фестивалот ќе ја има ансамблот ,,Кочо Рацин” од Кичево, а во рамки на завршниот концерт, свои настапи ќе имаат и гостите од Полска, Австрија и Србија. Влезот за секоја од фестивалските вечери е слободен.
Балканскиот фестивал на народни песни и игри е меѓународна фолклорна манифестација, основана во 1962 година. Над дваесетина години Балканскиот фестивал на народни песни и игри е член на двете асоцијации во рамките на УНЕСКО – Интернационалниот совет на организациите за фолклорни фестивали и фолклорна уметност и Меѓународната организација за фолклорна уметност.
OhridNews
