Исклучителен успех постигнаа екипите на Факултетот за туризам и угостителство од Охрид, на Универзитетските спортски игри што деновиве се одржаа во нашиот град. Тие беа најуспешни во најпрестижните спортски дисциплини, освојувајќи вкупно четири медали, од кои две злата.
До најсјаните одличја во исклучителна конкуренција стигна женската ракометна екипа на ФТУ-Охрид, како и машката фудбалска екипа која исто така го освои првото место на игрите. Успехот го надополнуваат и второто место во пинг понг поединечно, како и третото место во пинг понг-дубл. На спортските игри во Охрид што се одржаа на терените на СРЦ „Билјанини низвори“ и на други спортски локации, учествуваа екипи од универзитетите „Св.. Климент Охридски “од Битола и „Св. Кирил и Методиј“ од Скопје.
Извонредните спортски резултати на студентите само се надоврзуваат на успехот што Факултетот за туризам и угостителство од Охрид го има на образовно поле, каде со години оваа високообразовна установа е меѓу најуспешните факултети не само на Универзитетот „Св. Климент Охридски“, туку и во земјата воопшто.
