Фајзер денеска побара од регулаторното тело на САД да одобри итна употреба на нивната вакцина за коронавирус, што може да се случи на почетокот на декември и да означи почеток на крајот на пандемијата, објави АП, пренесува Миа.
Предлогот дојде само еден ден откако компаниите Фајзер и БионТех објавија дека се покажало оти нивната вакцина е околу 95 проценти успешна во спречување на лесни и тешки форми на Ковид-19.
Фармацевтските компании соопштија дека поради добрите резултати од студијата, брзо треба да се одобри поширока употреба на вакцината, а тоа може да го стори американската Администрација за храна и лекови (ФДА), дури и пред крајот на последната фаза на тестирање.
Фајзер истата молба ја испрати и до Европската унија, како и до Велика Британија.
Нашата работа е да испорачаме безбедна и ефикасна вакцина која никогаш не била попотребна и поитна, рече извршниот директор на Фајзер, Алберт Бурла.
Со зголемувањето на бројот на пациенти во светот, има голем притисок врз регулаторните тела да донесат брза одлука.
Помошта само што не пристигнала. Треба да ги засилиме рестриктивните мерки додека чекаме вакцината да стигне до населението. Никако не станува збор за симнување на маските и за укинување на рестриктивните мерки, рече водечкиот американски епидемиолог Ентони Фаучи.
ФДА и да ја одобри вакцина за поширока употреба, друга американска владина организација мора да одлучи како да дистрибуира ограничен број вакцини на Американците кои се нестрпливи да ја примат.
Сè уште е непознато колку вакцини моментално се достапни, но првичните количини не се големи и мора рационално да се дистрибуираат.
Фајзер соопшти дека може да произведе максимум 50 милиони дози до крајот на годината.
За Америка можат да се направат 25 милиони вакцини во декември, 30 милиони во јануари и 35 милиони во февруари и март, според информациите на Националната медицинска академија.
Примателите ќе треба да земат две дози во рок од три недели.
OhridNews
