Езерските полиции од Охрид и Поградец заеднички патролираат

Претставници на македонската и албанска гранична полиција денеска за прв пат заеднички патролираа на Охридското Езеро. Заедничките прекугранични патроли се дел од договорот за соработка помеѓу полициите на Македонија и Албанија кој е во согласност со Конвенцијата за соработка на полициите во Југосисточна Европа која е усвоена во мај 2006 година.

Целта на заедничките патроли е поттикнување на соработката помеѓу полицииите и борба против организираниот  криминал, ни изјави Горан Достиноски, командир на ПС Охрид. Според Достиноски безбедносната состојба на Охридското Езеро е стабилна. „Најголем проблем претставуваат риборкрадците бидејќи во Албанија не постои забрана за риболов и често се случува албански рибари да влезат во македонските територјални води и обратно, а во лето се случува граѓани од Македонија да залутаат во Албанија“, вели Достиноски.

^{Горан Достиноски}

Според Сали Горица од езерската полиција на Албанија, заедничките патроли ќе придонесат да се спречи илегалното преминување на границата преку вода и за намалување на недозволената трговија со луѓе и добра .

^{Сали Горица}

Во 2007 година Езерската полиција во Охрид регистрирала 3  случаи на нелегално преминување на границата, додека оваа година не бил регистриран ниту еден таков случај.

^{Започнаа заедничките македонско-албански полициски патроли}