Во видно освежен и реновиран ентериер, вчера вечер Џез Ин го прослави својот 30-ти роденден. Секогаш отворен за љубителите на џез културата, во изминатите три децении, клубот силно пркоси на општествените и културолошки промени, притоа ставајќи се на пиедесталот како единствен џез клуб кој опстоил толку долго на Балканот.
За загревање на присутните се погрижија стендап комичарите Зоран Донев, Никола Сиљаноски и Јован Цветкоски, за забавата да продолжи со белградскиот џез-фанк квартет Нејкед. Кулминација на роденденската забава беа актерите на Народен Театар Охрид, Стрезо Стаматовски и Никола Тодорски, кои со свој специфичен хумор раскажаа дел од секојдневните случувања во клубот во изминатите триесет години.
Џез Ин е формиран во 1989 година и цврсто чекори во својот зацртан џез концепт, притоа нудејќи им на гостите и посетителите врвна услуга и проверена забава. Препознаен од посетителите повеќе пати ја добива наградата за врвен избор на престижните Трип Адвајзор и Лонли Планет.
Во годината во која го слави својот јубилеј Џез Ин приреди незаборавни вечери со бендови како Кристина Дијаз Трио, Фолтин, Звонимир Тот, Тони Китановски, Кабадајас, Томе Илиев Секстет, Трансмишн 3 Проџект, Некст Ту Сајленс, Сашо Поповски Трио, а беше домаќин на зимскиот и летниот комеди маратон, како и домаќин на популарните стенд ап вечери.
Фото: А. Момироска
OhridNews
