Организацијата на високо ниво, посветеноста, и позитивните оценки од делагатите од првото издание на Европскиот куп и Балканското првенство во триатлон вродија со плод. Триатлон федерацијата на Македонија (ТФМ) и Асоцијацијата за спортови „Спорт за сите-сите за Спорт“ од Охрид добија нова можност за организирање на Европски куп во триатлон за јуниори, кој ќе се одржи на 6-7 јули следната година во Охрид.
- Продолжуваме да чекориме по зацртаната цел и да го исполнуваме ветеното. Оценките на делегатите, посебно од српскиот кој не го криеше задоволството од добрата организираност и посветеност многу ни помогна. Пред нас стои нов предизвик. Со две раце го прифативме и веќе почнуваме со работа и подготовка. Охрид ги воодушеви сите учесници и гости, а преставниците од Европската триатлон федерација беа импресионирани од условите кои ги нуди нашиот град. – изјави првиот човек на Асоцијацијата, Иван Цветкоски.
Првото издание на Европскиот куп во триатлон за јуниори и Балканското првенство во Охрид се одржа на 15 септември оваа година, а учество зедоа вкупно 280 натпреварувачи. На триатлонот во Охрид учествуваа и рекреативци поделени во возрасни категории, кои му дадоа дополнителен шмек на новото спортско поглавје во нашиот град.
OhridNews
