Европската комисија препорача отворање на пристапните преговори меѓу ЕУ и Македонија, соопшти еврокомесарот за проширување Оли Рен на денешната прес – конференција во Брисел на која го презентира Извештајот за напредокот на земјата за 2009 година.
– Сега можеме да препорачаме отворање на преговори за членство со ПЈРМ. Земјата оствари уверлив напредок и суштински се осврна на клучните реформски приоритети коишто во нивниот жаргон се нарекуваат 8 плус 1 одредница. Комисијата смета дека земјата ги задоволува критериумите од Копенхаген и овие елементи овозможија да препорача препоговори за членство. Верувам дека Владата во Скопје ќе го сфати ова како мошне силен поттик и охрабрување конечно да го разреши прашањето за името кое што е тука веќе 18 години, рече Рен.Одржувањето на добрососедските односи вклучително и преговорите за меѓусебно прифатливо решение за името под закрила на ОН, посочи Рен, останува од суштинска важност.
Конечната одлука дали и кога Македонија ќе ги почне пристапните преговори ќе ја донесе Советот на ЕУ во декември. Македонија доби статус на земја кандидат за членство во ЕУ во декември 2005 година.
По објавувањето на позитивната вест, поголем број автомобили со развеани македонски знамиња поминаа низ улиците на Охрид.
ohridnews
