Швајцарија ја симна Италија од тронот и се пласираше во четвртфиналето на ЕП 2024.
На Олимпискиот стадион во Берлин, избраниците на Мурат Јакин целосно ги надиграа „азурите“ и победија само со 2:0. Головите за големиот успех ги постигнаа Ремо Фрујлер во 37. минута и Рубен Варгас секунди по рестартот на играта.
Од тимот на Италија, само Џанлуиџи Донарума се претстави добро, спасувајќи ја својата земја од пораз и тотален срам на ЕП 2024. Цели 90 минути Федерико Киеза и друштвото речиси и не создаваа сериозна опасност пред Јан Сомер
Така Стариот континент ќе има нов шампион, а во спор за пласман во полуфиналето, жилавите Швајцарци го чекаат победникот од двојката Англија-Словачка, кои се соочуваат утре.
Германија стана втората селекција која се пласираше во четвртфиналето на ЕП 2024.
Германија втор четвртфиналист
Домаќините ја победија Данска со 2:0 во осминафиналето меѓу двете селекции по прилично бурната ноќ во Дортмунд.
Таа беше таква, буквално и фигуративно.
Буквално, затоа што на средината на првото полувреме, големо невреме го преврте стадионот, поради што натпреварот беше прекинат близу 25 минути.
И фигуративно – затоа што натпреварот беше голем спектакл, со многу шанси пред двата гола, неверојатни одбрани, поништени голови и важни интервенции на ВАР.
Сепак, „панцирите“ успеаја да ја наметнат својата волја и постигнаа успех со головите на Каи Хаверц од пенал во 53. минута и Џамал Мусиала во 68. минута.
Така Германија во четвртфиналето го чека победникот од двојката Шпанија-Грузија.
OhridNews
Фото: УЕФА Фејсбук/МИА
