Актуелниот европски првак Италија со победа ја почна одбраната на титулата, совладувајќи ја вечерва во Дортмунд репрезентацијата на Албанија со 2-1 во рамки на првото коло во групата Б на ЕВРО2024.
Натпреварот почна шокантно за Италија која по само 23 секунди се најде во резултатска негатива, откако Бајрами искористи кардинална грешка во противничката одбрана и го постигна најбрзиот гол во историјата на европските првенства.
Италијанските фудбалери брзо се созедоа и по само 16 минути игра го презедоа водството.
Бастони во 11 минута израмни на 1-1, а пет минути подоцна Барела донесе целосен резултатски пресврт и стартна победа за Италија на ЕВРО2024.
Во рамки на групата Б претходно денеска Шпанија со 3-0 ја совлада Хрватска.
Шпанските фудбалери до победата дојдоа со голови во првото полувреме во кое ги искористија сите грешки во хрватската одбрана,
Капитенот Мората го отвори резултатот во 29 минута, а само три минути подоцна предноста ја удвои Руиз. Во последната минута од првото полувреме на 3-0 зголеми Карвахал.
Хрватска во 80 минута не успеа да реализира пенал преку Петковиќ.
OhridNews
