Единаесето издание на меѓународната ликовна колонија „Вевчански Видувања“ во сабота

Единаесетото издание на Меѓународната ликовна колонија „Вевчански Видувања“ ќе се одржи во периодот од 25 јуни до 10 јули 2022 година, во живописниот амбиент на ресторанот „Виа Игнација“, во Вевчани.

Оваа година на Колонијата свое учество ќе земат преку 20 афирмирани сликари од Република Македонија, од балканските држави, како и од неколку европски земји. Истовремено, за прв пат од оваа година, како дел од Меѓународната ликовна колонија „Вевчански видувања“ се организира и Летна ликовна школа за деца, во чии рамки, под раководство на професорката Лара Ташковска повеќе од 40 млади дечиња и идни уметнички надежи ќе имаат несекојдневна можност да се запознаат со тајните на сликарската уметност, вели Ефимија Угриновска Кукоска, од организациониот одбор на Меѓународната колонија „Вевчански видувања“.

Свеченото отворање на Колонијата, информира Угриновска Кукоска, е закажано за 25 јуни од 20 часот.

Во знакот на долгогодишното постоење на Колонијата, на почетокот ќе му биде доделено одличието „Плакета порта“ на академскиот сликар Доне Миљановски, по што ќе следува целовечерен спектакл со музичката икона од поранешните југословенски простори Лепа Брена.

Почнувајќи од 2010-та, секоја година на крајот на месецот јуни, во реномираниот ресторан „Виа Игнација“, во Вевчани се организира Меѓународната ликовна колонија „Вевчански видувања“. На оваа реномирана културно-уметничка манфестација имаат земено учество над 150 еминентни ликовни уметници од државата и од странство.

OhridNews