На денешен ден пред 11 години кај Смилковското езеро беа убиени момчињата Филип Славковски, Александар Наќевски, Цветанчо Ацковски и Кире Трпковски, како и рибарот Борче Стевковски.
Во судскиот процес за случајот познат како „Монструм“, на доживотен затвор беа осудени Алил Демири, Африм Исмаиловиќ и Агим Исмаиловиќ. Обвинетиот Фејзи Азири доби 15 години затвор, а Хаки Азири 9 години. Ослободителна пресуда поради недостиг на докази доби единствено обвинетиот Сами Љута.
Судењето за „Монструм” почна на 20 декември 2012 година. Во јуни 2014 година, шест обвинети лица беа осудени на доживотна казна затвор. На 24 ноември 2017 година, Врховниот суд ја укина пресудата и процесот го врати на повторно судење, а осудените беа ослободени од притвор.
Повторното отворање на случајот уследи по објавувањето на преслушуваните материјали, т.н. бомби од страна на опозицијата во 2015 година. Случајот го презеде СЈО и судењето почна од почеток во мај 2018 година. Во меѓувреме СЈО беше укинато, но истите обвинители продолжија да го водат случајот.
По изречените казни, петмината осудени во случајот „Монструм“ поднесоа жалби, но Апалацискиот суд во септември лани ги одби како неосновани и ги потврди првостепените пресуди.
Беа организирани протести на роднини на осудените, а политичари и политички субјекти најавија и меѓународна истрага за случајот.
Осудените Алил Демири и Африм Исмаиловиќ се во бегство во Косово, по нив беа распишани потерници, но и покрај ветувањата од Приштина тие досега не се екстрадирани во Северна Македонија.
Петкратното убиство кај Смилковското езеро се случи на Велики четврток пред Велигден на 12 април 2012 година.
OhridNews
фото. МИА
