Согласно најновите информации добиени од јапонските надлежни органи, од македонското министерство за надворешни работи информираат дека има промена во однос на состојбата на тројцата македонски државјани кои се наоѓаат на бродот “Diamond Princess” во Јокохама, Јапонија.
Потврдено е присуство на коронавирусот кај еден од нив кој во моментот е хоспитализиран во здравствена установа во Јапонија. Амбасадата на Република Северна Македонија во Токио е во комуникација со споменатиот македонски државјанин. Воедно, амбасадата на дневна основа комуницира и со останатите двајца македонски државјани кои сѐ уште се наоѓаат на бродот во Јокохама и кои изјавуваат дека се чувствуваат добро и досега не пројавиле симптоми кои може да укажуваат на присуство на коронавирусот, велат од МНР.
Министерството за здравство на Јапонија продолжува со спроведување на тестови за присуство на коронавирусот кај лицата кои се наоѓаат во карантин на бродот. При вршење на анализите предност имаат лица со симптоми кои укажуваат на присуство на вирусот, лица над 75 годишна возраст и лица со хронични заболувања.
Министерството за надворешни работи на Република Северна Македонија, преку амбасадата во Токио, редовно ја следи состојбата на македонските државјани кои се наоѓаат во Јапонија и остварува комуникација со надлежните јапонски органи во врска со мерките што се преземаат за спречување на ширењето на корона вирусот.
Крузерот со речиси 3.700 патници, се наоѓа во двонеделен карантин на пристаништето. Крузерот ја напуштил Јокохама на 20 јануари, а се вратил на 3 февруари од кога е во карантин. Јапонските власти решија да го стават бродот во двонеделен карантин, за да се спроведеат медицински тестови над сите патници.
OhridNews