Собранието на Република Македонија на првото продолжение од вчерашната 95 седница, треба да ја усвои предлог одлуката за именување на Одбор за прослава на 1100 години од смртта на Св. Наум Охридски. Овој одбор ќе биде задолжен да ја организира прославата на овој значаен јубилеј на државно ниво.
Во предлог одлука за претседател е именуван Трајко Вељаноски, претседател на Собранието на Република Македонија, а за членови на Одборот за одбележување на 1100 години од смртта на Св. Наум Охридски се избрани: Архиепископот охридски и македонски г.г. Стефан, Митрополитот дебарско – кичевски г. Тимотеј, – Игуменот на манастирот Св. Наум Охридски г. Архимандрит Нектариј, пратениците во Собранието на Република Македонија, Цветко Грозданов, Томе Чинговски, Сафет Незири, Бесим Догани и Роза Топузова- Каревска, како и академикот Цветан Грозданов и професорот Стојан Ристески.
Овој одбор ќе биде формиран во согласност со Одлуката за одбележување на јубилејни годишнини на значајни настани и истакнати личности во Република Македонија и Програмата за одбележување јубилејни годишнини на значајни настани и истакнати личности за 2010 година.
