– Групата е слична, можеби и полесна од онаа во Литванија. Шансите за пласман во понатамошната фаза на македонската репрезентација се големи. Србите во моментов не функционират добро како репрезентација. Црна Гора и Босна и Херцеговина ни се познати противници. Литванија најави подмладување на селекцијата додека Летонија е рамо до рамо со репрезентација на Финска, која ја победивме на ЕП. Но, Македонија сите противници ќе ја гледаат на друг начин и пристапот на играта мора да биде повеќе од 100%. Сите ќе ги анализираат кошаркарите до детал и нема да може ништо да ги изненади – посочи селекторот на легандардната селекција од Литванија, Марин Докузовски.
Верната сенка на Докузовски, а подоцна и селектор на македонската кошаркарска репрезентација Марјан Лазовски исто така е оптимист по извлекувањето на групата.
– Нема фаворити што се издвојуваат во нашата група. Ни еден противник не е лесен, ако во мечот влезеш лежерно. Пристапот на играта беше она што ја красеше Македонија на ЕП во Литванија. Тоа историско четврто место треба да води напред, и да биде штимунг за новите генарации. Исто така многу работи зависат кои кошаркари ќе се најдат на списокот на идниниот селектор на македонската репрезентација. Верувам, дека ќе го избере вистинскиот и ќе не одведе до уште едно историско место на Европските првенства – потенцираше Лазовски, кој беше селектор на Македонија на предквалификациите за Олимписките игри во Лондон.
