Иако Општинската организација на СДСМ од Охрид, вчера на прес конференција тврдеше дека градоначалникот Петрески се враќа во Охрид со првиот авионски лет, Петрески преку соопштение од Австралија попладнето,  излезе со сосема спротивен став,  дека својата службена должност во Австралија ќе ја оствари до крај и дека ќе се врати во Охрид, само доколку биде неопходно.

Претседателот на охридскиот огранок, Науме Јованоски вчера во неколку наврати потенцираше дека е во дирекна комуникација со градоначалникот и дека тој се согласил да се врати назад во Македонија.

-Нашата партија сметаше дека поважно е градоначалникот да биде помеѓу своите граѓани отколку да ја реализира до крај официјалната и однапред утврдена посета на Австралија. Ваквиот партиски став и образложението за приоритетноста на нештата, во комуникацијата која што ја воспоставивме со него, беше целосно прифатен од страна на градоначалникот и затоа посетата  ќе биде прекината и во најбрз можен рок  градоначалниот ќе се врати во државава. –рече Јованоски, при што не сакаше да шпекулира за точниот датум, кога Петрески ќе пристигне во Охрид.  

На  новинарско прашање -Дали постојат проблем во партискиот однос помеѓу него и градоначалникот,  Јованоски,  поторно одговори дека нивната меѓусебна комуникација е постојана и тековна.

-Односите помеѓу мене како претседател и градоначалникот се коректни. Ние во последниве неколку месеци апелираме на ширење на партиско единството. Ние до сега во неколку наврати и во вторникот, пред да замине за Австралија се договоривме за сите активностои кои ќе следат во текот на неговиот престој во Австралија и по неговото враќање. Пред се, за одржување на седницата на Советот на Општина Охрид. Значи сме во дирекна комуникација и во овој момент.- нагласи Јованоски.

На прашењето, -Што ќе се случи доколку Петрески не го послуша партискиот став и не ја прекине посетата од Австралија и дали од него партијата ќе бара одговорност?- Јованоски со целосна верба, дека ставот на партијата е поддржан од Петрески изјави

-Ова е директна комуникација, не гледам  зошто не би се вратил, сега разговаравме со градоначалникот.  Градоначалникот присуствува на седниците на централниот одбор на партијата и за тоа треба да дискутира и да дава образложение центалното раководство на Партијата, рече Јованоски.