Овој Кипријан, што се слави денес како светител, претходно беше маѓесник или, со современ јазик кажано, окултист. Се беше преселил од Картагина во Антиохија, во времето кога таму живееше христијанката Јустина. Едно развратно момче од незнабошците се занесе од нејзината убавина и по секоја цена сакаше да ја обљуби. А кога Јустина го одби одлучно, тој побара помош од Кипријан.
Кипријан гаташе и баеше, наведувајќи го духот на блудот на Јустина, за во неа да се разгори страста кон момчето, но се беше залудно зашто Јустина ги одбиваше од себе духовите на злобата со крсен знак и молитва.
Тогаш Кипријан ја позна силата на крстот и сам се крсти, а потоа стана презвитер и епископ. Кон крајот на третиот век беа погубени во Дамаск, како сведоци за Христа. Црквата ги слави заедно, славејќи ја победата на Јустина над окултистот Кипријан, односно власта на Христа над нечистите духови.
