Дел од објектите со карактеристична староградска архитектура во Охрид, во идина ќе добијат нови фасади и комплетно обновен надворешен изглед. Ова ќе го овозможи Проектот за обнова и конзервација на фасади во значајните градски јадра, кој ќе го спроведува Министертвото за култура на Република Македонија. Според планираното, Охрид треба да биде опфатен во втората фаза од најавените проектни активности.
Од Националната установа Завод и Музеј од Охрид информираа дека веќе имаат напревено детална и опсежна анализа на сите објекти кои би требало да бидат опфатени со овој проект, а конкретните предлози веќе биле доставени до Министерството за култура.
-Претежно се работи за објекти кои се лоцирани во стариот дел на градот и чаршија, но има и неколку кои се надвор од централното градско подрачје. Во моментов не може да се прецизира точната бројка на објекти во Охрид, чии фасади ќе бидат реконструирани и дека истата ќе биде позната откако Министертвото ќе донесе конечна одлука и ќе одобри средства за таа намена, вели Тања Паскали Бунташеска, директор на Охридскиот Завод и Музеј.
Таа објасни дека во рамки на овој проект планирано е да биде обновен само надворешниот изглед на објектите, нивните фасади, балкони и покриви.
Од Министертвото за култура на Република Македонија информираа дека на подрачјето на целата држава ќе бидат реконструирани фасадите на околу 250 значајни објекти од 19 и 20 век, на кои им е потребно враќање на автентичниот изглед. Според планираното најпрво ќе треба да одредат приоритетите и во наредните пет години, ќе се издвојуваат средства за санација.
– По изготвувањето, анализата ќе биде доставена до Владата на Република Македонија, со цел да се утврди план и динамика за понатамошна заштита, конзервација, реставрација и презентација на фасадите во другите градски јадра, рече министерката за култура Елизабета Канческа-Милевска, за време на презентацијата на проектот која се одржа неодамна во Скопје.
Таа најави дека до крајот на оваа година ќе бидат конзервирани и реставрирани фасадите на пет објекти од старата градска архитектура на Крушево, Скопје, Прилеп, Битола и Кратово, а за нивната санација ќе бидат наменети 11 милиони 234 илјади денари.
