Декада на Ромите

Малиот Али го вози своето сестриче низ охридските улици во корпа на нивниот прастар точак. Во втората година од интернационалната иницијатива за вклучување на ромската популација во општествените и социјални токови, овој народ и натаму останува еден од најсиромашните во светот. Нашата земја и нашиот град не се исклучок.

Според информациите од Центарот за социјална работа – Охрид, односно в.д. директорката Билјана Наумоска, околу 400 домаќинства од ромска националност, во Охрид, се корисници на некаков вид социјална помош. Освен сиромаштијата, Ромите ги притиска и необразованоста, најголем дел од децата воопшто не одат на школо, а со стапување на сила на законот за задолжително средно образование, ситуацијата ќе биде уште потешка.

„Активностите на центарот се интензивни и доста им се помага, посебно на жените Ромки, особено околу заштитата и грижата за децата, околу медицинските и гинеколошки контроли.

Имаме посебни случаи кога доделуваме еднократна парична помош за тешко болни или загрозени. Иако месечната помош е релативно мала (нпр. за двочлено семејство е 2.200 денари) сепак е редовна.

Но, менталитетот и слабата наобразба на голем број Роми ствара отпор кон интитуции од било кој вид. Многу ромски деца немаат ни основно образование, а за средно не станува збор. Не сме оптимисти дека во тој поглед нешто ќе се смени“ вели Наумоска.

Девет земји од Централна и Јужна Европа земаат учество во Декадата за вклучување на  Ромите, Бугарија, Хрватска, Чешка, Унгарија, Македонија, Црна Гора, Романија, Србија и Словачка. Сите држави имаат значителни ромски малцинства, со бројни социјални и економски проблеми.