На свеченоста присуствуваа претставнцици на Сојузот на борците на Македонија, преживеани борци и почитувачи на традицијата, министертот за одбрана Зоран Коњаноски, градоначалници, претставници на политички партии и граѓани. Говорејќи пред присутните, генералот во пензија и претседател на Сојузот на борците, Тодор Атанасовски истакна дека НОВ, беше мултиетничка војна.
-И денес Македонија ништо за себе не може да постигне ако не се сплотени сите народи кои живеат во овааа држава, рече генералот Атанасовски.
Пред присутните се обрати и министерот за одбрана Зоран Коњаноски кој истакна дека Македонија денес ги живее придобивките од НОВ, но и дека е исправена пред нови предизвици.
-Државните и национални интереси се тие на кои треба сите ние да се подредиме. Денес водиме битка за успешна, просперитетна и европска Македонија, рече Коњаноски, додавајќи дека ЕУ и НАТО се единствена алтернатива на земјата.
Собирот го поздрави и градоначалникот на Струга Рамиз Мерко, а меѓу присутните беа и градоначалниците на Охрид, Дебрца, Карпош и Куманово, како и претседателот на СДСМ, Бранко Црвенковски. Тој во изјава дадена за медиумите истакна дека периодот на НОВ е најсветлиот во историјата на македонскиот народ и секој обид да се направи ревизија или тој да се стави во сенка претставува директен атак врз нашиот идентитет. Според Црвенковски историските датуми и обележја од НОВ треба да се одбележуваат и чуваат, а не да се забораваат затоа што тие се потсетник на времето кога се удрени темелите на македонската држава.
-Не може во овој период да се градат стотици нови споменици, а во исто време оние што одамна се изградени и посветени на хероите на НОВ да се запоставени и руинирани. Тоа е неодговорен однос.-рече Црвенковски.
