„ЦЕПЕНКОВ’N ROLL“ нова премиера на Детското драмско студио „Драмакидз“

Театарска претстава на Детското драмско студио „Драмакидз“ со наслов „ЦЕПЕНКОВ’N ROLL“ ќе биде изведена вечерва, 10 декември, во Центарот за култура „Григор Прличев“, со почеток во 20.00 часот.

„ЦЕПЕНКОВ’N ROLL“ е патување низ времето и мудростите на македонската традиција, преку кое ќе направиме мост помеѓу старите преданија и модерната култура. Оваа претстава ги истражува богатствата на македонското усно творештво но со еден свеж и провокативен пристап, беше истакнато на прес конференцијата одржана денеска.

Околу мене има една екипа која три години работи турбо и можам да ја претставам иднината на нашите нови граѓани кои ќе се занимаваат со култура. Овие деца што ги гледате овде внесоа нова енергија во оваа наша куќа, една свежина, една убавина, на чело со нашата режисерка Ирена Стериоска, Тина Тодороска Петреска и нивниот координатор Зоран Левески. Ве покануваме вечерва да дојдете и да ја видите премиерата што овие прекрасни млади луѓе ја направија. Сакам прво нив да им се заблагодарам од се срце, заради ентузијазам, заради љубов, заради сериозна доверба во тимот кој работи за развивање на младите луѓе во нашава средина. Ве молам за поддршка, не нас, туку овие млади луѓе да ги поддржувате, а ќе ги поддржите ако редовно ги гледаме и редовно комуницираме со нив. – изјави директорот на НУЦК „Григор Прличев“, Горан Стојаноски.

Претставата која трае 40 минути е под режисерската палка на Ирена Стеријовска Јончевска, додека за драматургијата задолжени се Ирена Стеријовска Јончевска и Кристина Тодороска Петреска.

Во однос на самата содржина на претставата, го одбравме Цепенков како неизмерен извор на мудрости приказни и истиот се обидовме да го преведеме на денешен јазик. – истакна драматургот Кристина Тодороска Петреска.

Во претставата играат Евгенија, Бојан, Ирма, Леона С, Јана, Горазд, Бојана, Наталија, Ангел, Леона П, Марија, Лора, Леа, Матеј, Климент, Софија, Илина, Коста,Борис, Мила, Даријан, Елеонора.