Членови на охридското студио за танц „ Соната“ се вратија со бројни награди од Меѓународниот танцов натпревар Macedonia Open 2015 што се одржа во Скопје. На натпреварот учествуваа 37 членови од „ Соната“ кои се натпреваруваа во 11 категории.
Во категоријата Show Dance Formation Junior младите членови на „ Соната“ и покрај тоа што за прв пат се натпреваруваа на меѓународен натпревар го освоија првото место. Со златен медал се закити и Сара Сталевска во категоријата модерен Балет Соло Јуниор. Во категоријата Хип Хоп Дуо Возрасни, Олгица Симеонова и Јетон Мусли ја освоија бронзата. Сите останати натпреварувачи се пласираа во финалето во соодветните категории и се закитија дополнително уште со две трети, пет четврти места и две петти места.
Од „ Соната“ велат дека се многу задоволни од постигнатите резултати, со оглед на тоа што на натпреварот учествувале над 2100 танчери од целиот Балкан.
– Горди сме на сите учесници што достојно го претставија не само клубот, туку и Охрид.Докажавме дека „ Соната“ е еден од најдобрите клубови на Балканот, велат од охридското студио.
Членовите на „ Соната“ во наредниот период ги очекуваат два меѓународни натпревари во Крагуевац и Бар, за кои имаат добиено специјална покана за учество од страна на организаторите.
OhridNews
