“Нашата изборна кампања и нашите предизборни активности се реализираа онака како што и ветивме уште на почетокот-во една крајно позитивна, релаксирана и демократска атмосфера. Совесно, професионално, посветено, во изминатите 19 дена нашиот општински изборен штаб секојдневно ги реализираше своите планирани предизборни активности, согласно утврдената агенда “, рече денеска на завршната прес-конференција, шефот на Општинскиот изборен штаб и кандидат за пратеник од СДСМ-Охрид, Томе Чингоски. При тоа, тој ја обвини власта дека води предизборна кампања со државни пари. “Изминатиов период, актуелната власт не престана со својата добро позната тактика, со закани, притисоци, заплашувања и насилство врз нашите граѓани да се обиде да си обезбеди гласови за својата коалиција “, додаде Чингоски. Тој денеска запраша зошто се потребни анкетите, кога за неколку дена народот ќе си го каже своето на денот на гласањето. ” Дали во ВМРО навистина веруваат дека се уште можат да ги излажат граѓаните со такви наивни финти и ефтини измами, какви што се нарачаните анкети во текот на изборната кампања или со изборната листа со двојници на нашите кандидати”, праша Чингоски.
На денешната прес-конференција уште еднаш беа потенцирани дел од забелешките што ги има СДСМ и нејзината коалиција поврзани со предизборната кампања ВМРО-ДПМНЕ. ” Водат партиска кампања со државни пари, средбите со граѓаните ги одржуваат во објектите и институциите каде што директоруваат нивните кадри, ги возат возилата од државните институции за партиски цели, безмилосно и несовесно да трошат државни пари”, обвини денеска Чингоски.
А. Ристоска
