Четири нови заболени од свински грип се потврдени во земјава. Од шесте испитани сомнителни случаи, само двајца немале свински туку обичен грип. Тројца од четворицата заболени, грипот го добиеле во странство. Четврата заболена, пак, не патувала никаде и не знае од каде можела да го добие грипот. Се прават дополнителни испитувања за да се провери од кого се заразила. Досега на инфективната клиника вкупно се лекувани 155 луѓе, од кои кај 51 е потврдено присуство на новиот вирус.
Од Министерството за здравство велат дека здравствената состојба на сите пациенти кои престојуваат на Инфективната клиника засега е стабилна. Во меѓувреме, никој во земјава не кажува кога точно ќе почне вакцинирањето против свинскиот грип. Единствената најава е дека вакцните се очекуваат да пристигнат во втората половина од овој месец.
Во меѓувреме, во соседството веќе бележат смртни случаи од грипот. Во Србија, починаа двајца и во некои градови веќе е прогласена епидемија од свинскиот грип. Во Украина и Грција се затворени се сите училишта, а во Хрватска неколку пациенти се борат за живот. Најлошо е во Турција каде се зголемува бројот на жртви.
Ohridnews
