Македонскиот ракометен првак Металург во ждребката во Виена доби атрактивни и квалитетни противници во групата А во Лигата на Шампиони.
Ривали на „металурзите“ во групата се германскиот Кил, Пари Сент Жермен, хрватскиот Загреб, шпанската Ла Риоха и уште една екипа која ќе ги мине дополнителните квалификации.
– “Групата е интересна, но и тешка. Имаме две екипи кои се јавни фаворити, Кил и Пари Сен Жермен. И двете се засилија за новата сезона и очекувам дека ќе играат главна улога во нашата група. Останатите четири, меѓу кои е и Металург, ќе водат вистинска војна за позициите кои водат во осминафиналето. Немам многу информации за Натурхаус ла Риоха, освен дека имаат земено неколку квалитетни засилувања, додека екипата на Загреб засега нема излезено во јавност со информации околу засилувањата за новата сезона. Како квалификант ја очекувам екипата на Брест Мешков, особено што турнирот ќе се игра во Брест. Лигата на шампионите е специфично натпреварување во кое секој може да победи секого, особено кога игра на домашен паркет. Наша прва цел е да обезбедиме пласман во осминафиналето на Лигата на шампионите, а во текот на натпреварувањето ќе видиме и за која позиција во групата ќе можеме да се бориме. Нема да ни биде лесно, но јас, како и секогаш, сум оптимист – рече хрватскиот стратег Лино Червар за официјалниот интернет сајт на Металург.
Две сезони по ред пулените на хрватскиот стручњак стигнуваат до четвртфиналет во Лигата Шампиони, а сезонава се подготвени за чекор повеќе.
Мх.П.
