Во трката за информации, но за жал повеќе за ексклузивност, медиумите известувајќи од големата несреќа што вчера се случи на Охридското Езеро пласираа доста контрадикторни информации. И додека за разногласието околу бројот на загинатите лица, патници и капацитет на бродот што потона донекаде има оправдување во штурите, конфузни и непрецизни информации на надлежните органи(Капетанијата ја немаше никаде), тоа никако не може да се каже за неморалното однесување на медиумските „екслузивци“ кои на јавноста вчера и сервираа некрофилија и грозоморни слики од трагедијата. Сето тоа во битка за малку поголема гледаност или читаност. Некои дури продаваа снимки, други беа заинтересирани да купат, а трети од пуста желба да се докажат и покажат се потрудија да презентираат „ексклузивни“ видеа без да се заштити идентитетот на жртвите.
Во авионските напади на Светскиот трговски центар на фамозниот 9.11 загинаа близу 3000 луѓе, но никој не ги покажуваше нивните безживотни тела како се извлекуваат од рушевините на „WTO“, а без притоа да не се води сметка за чувствата на публиката и пред се на семејствата на загинатите. Ама тоа е Америка.
А, се разбира приказната не е целосна ако ги нема вообичаените тенденцизони известувања на дел од бугарските медиуми кои побрзаа да ја обвинат цела Македонија за големата несреќа. Затоа пак претседателот Прванов како добар дипломат упати благодарност како до македонските институции така и до најобичните граѓани кои помогнаа во спасувањето на бугарските туристи.
Не дека сме совршени ама некои работи имаат црвена линија, која кај нас одамна е премината.
