Премиерот на Велика Британија, Борис Џонсон поднесе оставка од функцијата лидер на Конзервативната партија, по три бурни години на чело, обележани со Брегзит, Ковид и големи скандали.
Џонсон (58) објави дека ќе се повлече од функцијата по серијата оставки оваа недела од неговиот тим во знак на протест против неговото раководство, но ќе остане на функцијата премиер додека не се најде замена.
Јасна е волјата на парламентарната Конзервативна партија да има нов лидер, изјави британскиот премиер Борис Џонсон објавувајќи ја својата оставка.
Тој рече дека процесот на избор на тој нов лидер треба да започне сега, а распоредот ќе биде објавен следната недела.
И јас денеска назначив Кабинет додека не дојде нов лидер.
Поддршката за Џонсон се намали во изминативе денови поради обвиненијата дека тој ги игнорирал наводите за сексуално недолично однесување против член на партијата Крис Пинчер.
Волас фаворит за да го замени Џонсон
Министерот за одбрана Бен Волас е фаворит кога станува збор за замена на британскиот премиер Борис Џонсон.
Според нова анкета на ЈуГов (YouGov), каде беа анкетирани над 700 членови на Конзервативната партија, Волас се најде на првото место со 13 отсто поддршка. Веднаш зад него е министерката за трговска политика Пени Мордаунт со 12 проценти поддршка, јави Би-би-си.
Дванаесет отсто од испитаниците гласале за „ниту еден од наведените“.
Моментално многу е тесна трката меѓу првото и второто место, изјави за медиумот, Патрик Инглиш, придружниот директор на политичкиот и социјалниот истражувачки тим на ЈуГов.
OhridNews
