Бранислав Трпчески се повлекува од Советот на Општина Охрид, поради неспоивост на функциите. Имено деновиве градоначалниците на Охрид и Струга, Александар Петрески и Рамиз Мерко, ја потпишаа одлуката за именување на Трпчески за генерален директор на меѓуопштинското јавно претпријатие. По сила на закон Трпчески кој до сега беше вршител на должност, не ќе може да ја обавува и советничката функција.
– Се повлекувам од советничката функција и во наредниот период целосно ќе се посветам на „Проаква“, изјави за „Ohridnews“, Трпчески.
Местото на Трпчески во Советот ќе го заземе следниот на советничката листа. СДСМ на локалните избори освои 7 советнички мандати, а осми на листата за членови на Советот е Климе Тренески (1961) – квалификуван автомеханичар и приватен стопанственик.
Престанокот на мандатот на Трпчески ќе биде констатиран на седмата седница на Советот што ќе се одржи на 30 септември, кога ќе биде и верификуван мандатот на новиот советник.
Ohridnews
