Се’ уште не се пристигнати протоколите како треба да постапуваат хотелиерите по однос на новите мерки. Претседателот на Асоцијацијата на хотелиери – ХОТАМ, Крсте Блажески вели дека истите се очекуваат да ги добијат во текот на денот.
Сега се воведува и мерката за приложување на потврда за извршена имунизација, но се уште немаме добиено како детално треба да се постапува по тие протоколи. Спомнати се и редари, но треба да знаеме точна препорака како треба да постапуваат и што треба да бараат од самите гости. Во очекување сме во текот на денешниот ден дека ќе ги добиеме потребните инструкции вели Блажески.
Во однос на новите мерки за спречување и ширење на Ковид 19, Блажески смета дека некои од мерките се задоцнети.
Ситуацијата беше на терен чиста, па се дозволија многу работи да поминат, требаше барем некои тестови да се прават на гостите кои доаѓаа во државава, зошто имавме голем број гости и од дијаспората. Свадбите беа дозволени на отворено, се дозволија и на затворено и може тука требаше една мала контрола. Значи не да ги нема свадбите, туку требаше да се внимава малку повеќе на тие затворени простори, истакнува Блажески.
Блажески смета дека е потребна силна кампања за вакцинирање на населението за, како што вели, да бидат барем 50-60 проценти вакцинирани. Дел од нив ќе го имаат прележано и со такви некои бројки би биле побезбедни да влеземе во есен и зима која ќе биде поблага во однос на мерките од минатата, кога бевме затворени и со полициски час, што секако се одрази на работата на хотелиерите, додава Блажески.
Н.С.Ј
