Безбол во Охрид

04.01.07 00:43

На некогашниот многу популарен „Полигон за мали спортови“ го среќаваме американецот Пол. Со својот син и уште две деца ја играат онаа за нас комплетно неразбирлива игра безбол (baseball). Од каде сега безбол во Охрид? – го прашуваме.

– Жена ми е од Финска, таа е македонист-славист, за Нова Година сме кај некои пријатели во Охрид. Прекрасно е овде, времето е убаво, па го користиме малку да поиграме безбол – вели Пол, а потоа се труди да ни ги објасни правилата на овој во САД мегапопуларен спорт.

Имате терен, а на него бази, секоја екипа се труди да освои што повеќе од нив ама прво мора „пичерот“ да ја удри топката … – за кратко време се губам низ „лавиринтот“ непознати изрази.
Веројатно и ние сме им чудни на американците кога не` гледаат како се „палиме“ на фудбал.

^{Чудна игра, чудни правила…}

^{…но американците ја обожаваат}

Синот на Пол има добар „свинг“ (?!?)

А да, почнавме со „Полигонот“. Некогаш беше место за мегдан, гостувале и европски спортски имиња. Некои генерации се сеќаваат на извонредниот традиционален турнир во мал фудбал. Полни трибини. Сега е приватен имот. Општината со него врати долг кон градежна фирма. Не остана ништо од трибините, се претвори во „ругло“ на градот.
Барем за безбол е добар. Додека не „никнат“ некои нови згради. Штета.