На 24 часа пред закажаниот термин, Фудбалската фдедерација на Македонија, без соодветно објаснување, го одложи Езерското фудбалско дерби помеѓу Охрид и Караорман што требаше да се одигра оваа сабота на стадионот „Билјанини извори“ во Охрид, во рамки на второто коло од Втората лига.
Неофицијално, причина за одложување на Езерското дерби е претстојниот натпревар на шампионот Трим и Лум во еврокуповите, односно да се зачува теренот за овој натпревар. Во ГФК Охрид се изненадени од ваквата одлука на ФФМ, дотолку повеќе што во недела на истиот стадион ќе се одигра мечот од Првата лига помеѓу Воска и Вардар.
Од ГФК Охрид велат дека немаат ништо против Струга Трим и Лум, но за нив е несфатливо како може да важат двојни аршини, односно да се откаже само еден од предвидените два натпревари овој викенд на „Билјанини извори“. Револтиран од ваквиот однос, претседателот на Охрид, Данчо Целески, најави оставка. Во продолжение сооптението на ГФК Охрид во целост:
Утре на ден 19-ти август ТРЕБАШЕ да се игра првенствен натпревар помеѓу ГФК Охрид и ФК Караорман – ЕЗЕРСКО ДЕРБИ!
Караорман годинава слави 100 години од постоење, а Охрид 104 години од постоење – 100 години ЕЗЕРСКО ДЕРБИ.
Некои луѓе од ФФМ наречени комисија ни го одложија натпреварот денес околу 17 часот, тие луѓе најверојатно немаат осетено ни 100 натпревари во животот.Добивме соопштение – инструкции дека натпреварот ни е одложен без никакви наведени проблеми или причини.
Неофицијално од мои лични контакти е одложен натпреварот поради потреба да се ЧУВА ТЕРЕНОТ од штета, бидејќи ФК Трим и Лум Струга треба да игра европски натпревар следната недела. Да е шегата поголема ФК Воска Охрид во недела игра првенствен натпревар против Вардар во Охрид на ИСТИОТ СТАДИОН!Е сега да објаснат овие агрономи како ние ќе го оштетиме теренот а Воска и Вардар ќе ја “галат” тревата.
Вакво ЛУДИЛО фудбалско не сме доживеале одамна. Наместо да ни кажат со време да го организираме натпреварот на друго место во друго време ние бевме подценати како клуб од втора лига…
ГФК Охрид Лихнидос ги има исплатено сите свои обврски према ФФМ и сите институции во државата. За утрешниот натпревар се организирани карантин, прехрана, навивачки спектакл и се друго по ред… Преку 10 илјади евра трошок. Луѓе пристигнати од странство го продолжија својот престој за да бидат присутни на натпреварот и две менаџерски групи (Унгарија и Словенија) се веќе присутни во градот за да го следат натпреварот.
После оваа лакрдија, Јас Данчо Целески Претседател на ГФК Охрид, долгогодишен спортски работник најавувам оставка која ќе ја поднесам до управниот одбор и до Градоначалникот на Град Охрид.
Истотака ќе покренам тужба за загубена штета во име на ГФК Охрид против луѓето потписници на оваа одлука и против ФФМ.
Спортски Поздрав до сите вистински љубители на фудбалот во Македонија!
Данчо Целески
Претседател на ГФК Охрид Лихнидос
Охридњуз консултираше искусни фудбалски работници кои ни посочија дека одлуката на ФФМ е спротивна на правилникот за натпревари, како и дека Федерацијата не може да одложи натпревар 72 часа пред негово одигрување, а тоа да не биде во согласност со екипите кои треба да се соочат или поради други причини дефинирани во актите на ФФМ.
Г.М.
