Бесправно исечени дрва од паркот кај скалестата зграда !

Жителите од скалестата зграда на бул. „Туристичка“,  остро реагираат на сечењето  дрва  од дворното место на зградата, кое според нив бесправно го извршиле сосптвениците на деловните простории сместени во неа. Тие случајот го пријавиле до Комуналната инспекција која заедно со полицијата денеска излезе на лице место. „Направен е записник и во тек е утврдување на направената штета“ ни изјави раководителот на Комуналната инспекција, Танас, Танасоски. Тој најави дека против сторителите ќе бидат поднесени прекршочни пријави, а не ја отфли можноста против дел од нив да бидат поднесени и кривични пријави.

Не е прв пат соствениците на  дуќани во скалестата зграда да ги сечат дрвата од паркот со цел да се отвори погледот кон деловните простории на бул. „Туристичка“, што е за секаква осуда, вели комуналниот инспектор Танасоски. Тој смета дека треба да се стави крај на ваквото самоволие и повтори дека секој еден кој сака да исече дрво од јавна површина мора најпрвин да добие дозвола од Министерството за земјоделство, Комуналната инспекција и ЈП „Охридски Комуналец“, кои се должни да излезат на терен и да утврдат дали за тоа има основа. Во случајов таквата процедура не е запазена со што е направен прекршок, вели Танасоски.

Бесправното сечење на дрвата од паркот кај скалестата зграда ја наелектризира атмосферата и само благодарение на присебноста на поединци не дошло до физичка пресметка помеѓу станарите и дуќанџиите.