Базните станици се множат, но нема штетно зрачење?!

Бројот на базни станици на територијата на општина Охрид од ден на ден се зголемува. Во овој момент во градот има речиси 70 базни станици, од кои најголем дел им припаѓаат на мобилните оператори. Само дел од нив се поставени надвор од населените подрачја. Поголемиот број се поставени на индивидуални и колективни згради, или јавни објекти, што наидува на големо негодување кај граѓаните. Неодамна имаше реакции за поставување на базна станица во Видобишта и Лескоец, но и во национален парк, на спортскиот центар, како и на повеќе индивидуални објекти или инсталации, како што се телевизиските предаватели во старото градско јадро.

Речиси да нема ден, а да нема поплаки од граѓаните велат од општинскиот инспекторат. Оттаму објаснуваат дека граѓаните реагираат загрижени за своето здравје, но причини за тоа нема. Според досегашните мерења, ниту една од поставените базни станици не го надминува максималното ниво на дозволено зрачење од 0,2 миливати.

Од инспекторатот посочуваат дека од 1 јануари 2009 година на сила се нови законски прописи, според кои надлежна за издавање дозвола за поставување базни станици е локалната самоуправа, врз основа на еколошки елаборат кој го одобрува ресорното министерство. Од инспекторатот посочуват дека сопствениците на базните станици ќе треба да ја запазат оваа процедура, а тие кои нема да го направат тоа, ќе бидат отстранети. Исто така ќе се отстранат и базните станици кои го надминуваат дозволеното ниво на зрачење, за што наскоро ќе биде извршено уште едно еколошко мерење.

Експертите објаснуваат дека антените од мобилните оператори поставени на зградите и другите објекти зрачат  на три страни. Дозволени се вредности од 0,2 миливати врз квадратен сантиметар. Според нив зрачењето не е толку големо во зградата, туку е поизразено врз околните објекти, а единствениот начин да се контролира зрачењето од базните станици е редовно мерење.