Охрид е еден од ретките туристички центри на Балканот кои годинава не истакнаа привлечна понуда за дочек на Новата година. За разлика од македонскиот туристички бисер каде е неизвесно дали и какви организирани програмски содржини ќе има на градскиот плоштад за најлудата ноќ, во најпознатиот црногорски туристички центар, Будва, годинава ќе настапат големите балкански ѕвезди Џибони и Бојан Маровиќ. Комплетната програма на плоштадот во Будва е бесплатна, а ја организира Туристичката организација на Будва. Во македонската престолнина пак на сметка на градот Скопје на плоштадот ќе настапат Даниела Мартиновиќ и Петар Грашо
Охрид наместо за музички ѕвезди средствата од буџетот наменети за прослава на Нова година реши да ги употреби за помош на социјално најзагрозените семејства. Несомнено дека ваквата идеја е хумана и благородна, но дали општина како Охрид не треба да има средства и за едната и за другата намена. Дали со добра програма на плоштадот нема да им помогне на голем број граѓани кои немаат доволно средства за прослава во угостителските објекти и хотелите и тие за момент да се почувствуваат среќни и весели. Дочекот на Нова година е дел и од туристичкиот имиџ на Охрид кој привлекува гости. Но тоа треба да го сфатат и туристичките работници кои мора да го препознаат својот интерес во целата приказна. Таа никако не се прави во пет до дванаесет. Затоа одговорните треба уште од сега да размислуваат за дочекот на 2012-та, освен ако не веруваат во пророштвото на Маите.
