И по три години никако да почне најавената изградба на седумте патни правци, меѓу кои и автопатот Ќафасан – Охрид – Гостивар. Во изминатите три месеци Владата неколку пати го одложи распишувањето на тендерот за изградба на автопатиштата, по што одлучи седумте патни правци кои ќе се даваат под концесија да ги подели во два пакети. Во првиот источен концесиски пакет кој е во должина од 180 километри, предвидена е изградба, реконструкција, одржување и наплата на патарина на патните правци Крива Паланка-Романовце, Кочани-Штип и Миладиновци-Штип, како и реконструкција, одржување и наплата на патарина на изградените патни правци Миладиновце-Скопје (Хиподром) и обиколница Скопје. Автопатот Ќафасан – Охрид – Гостивар влегува во вториот, западен концесиски пакет. Тој предвидува изградба на 196 километри автопат на патните правци Стенковец-Блаце, Гостивар-Ќафасан и реконструкција и одржување со наплата на патарина на изградената магистрала Гостивар-Тетово-Скопје.
Со направените измени Владата очекува полесно да привлече инвеститори бидејќи цената на пакетот сега ќе биде помала. Вкупно изградбата на седумте патни правци се проценува на 2 милијарди евра. Според најавите тендерот за изградба на новите автопатишта ќе биде распишан до крајот на месецов.
Владината идеја за концесионирање на седумте патни правци наиде на остри критики од опозицијата. Најгласен меѓу критичарите е охридскиот пратеник Томе Чингоски, кој смета дека идејата на Владата е нереална и неостварлива на терен и дека сите силни најави за изградба на автопатната мрежа во земјата се очаен обид да се привлечат што поголем број инвеститори , како би можело да се наполни нереално проектираниот буџет.
– Ние како политичка партија бевме против распишувањето тендер за овие патишта затоа што не се создадени услови да бидат издадени под концесија, вели Чингоски.
Ohridnews
