Гробницата на Исус Христос во црквата на Воскресението Христово во Ерусалим е конкретната гробница која во четвртиот век ја пронашла Елена, мајката на царот Константин, заклучуваат научниците по извршената анализа на содржината на светилиштето. Претходно во ноември списанието National Geographic објави дека археолозите првпат по 500 години го отворија гробот на Христос од која ја отстранија мермерната плоча поставена на гробот во 1555 година. Причината поради којашто била поставена плочата е тоа што многу аџии се обидувале да откршат за себе дел од реликвијата. Под неа биле откриени камења, а под нив уште една плоча со крст, којашто најверојатно ја вдлабиле крстоносците. Научниците, исто така, открија дека светијата не била допрена. Тие сакаа да дознаат зошто Елена, којашто ги водела ископувањата на Голгота, решила дека токму таму е погребан Исус Христос.
Аргхеологот Фредрик Хиберт истакнува дека во текот на вековите храмот бил уништуван неколкупати, како од стихии – пожари и земјотреси, така и како резултат на инвазиите. „ Се чини дека се јавува видлив доказ дека на местото на коешто се поклонуваат денес аџиите, всушност е самата гробница, којашто е откриена во четвртиот век и на којашто ѝ се поклонувале крстоносците“, вели Хиберт. Георадарските и термографските скенери помогнале да се испита содржината на гробот, а за обработка на овие податоци ќе бидат потребни неколку месеци. Археолозите се надеваат дека тоа ќе им помогне да создадат виртуелна реконструкција на светилиштето.
Во Кувуклијата, капелата каде се наоѓа Светиот гроб, во моментов траат реставраторски работи, кои се планира да бидат завршени до пролетта 2017 година. Во текот на претстојните проучувања, научниците планираат да појаснат од што се состоела оригиналната површина, на којашто, според писанијата, три дена лежело телото на Исус Христос, како и да дознаат зошто света Елена решила токму на ова место да е локацијата на Светиот гроб. Капелата првично била подигната над местото на коешто е погребан Исус Христос, во четвртиот век. Таму се наоѓа особено почитуваната меѓу христијаните плоча, под којашто се наоѓало местото на погребението. Секоја година, почнувајќи од четвртиот век на Велика сабота тука се случува чудесното и мистично појавување на Благодатниот оган.
Дрвената капела неколкупати страдала од напади на противниците на христијанството, а исто така и во пожари и земјотреси, и неколкупати била повторно градена. Последниот пат е возобновена во 1810 година. Ова здание двапати страдало од земјотреси, а по стихијата од 1927 година, капелата е зајакната со челични греди.
Според Евангелието, по смртта на Христа неговото тело било положено во една од погребните пештери вдлабени во планината. Имено, таму на третиот ден се случило Воскресението на Исус. Се смета дека света Елена којашто водела ископувања на планината Голгота, го открила таму крстот на кој бил распнат Христос, а пота на тоа место го основала храмот на Светиот гроб.
OhridNews
извор Макфакс
