Дваесет и девет годишниот Александар Крадакоски управител на кочанската дискотека „Пулс“ е 60-тата жртва од несреќата во Кочани, потврди министерот за здравство Арбен Таравари.

Таравари истакна дека Карадакоски бил испратен на 17 март на лекување во Литванија, вториот ден по несреќата во Кочани, а претходно бил хоспитализиран во стара Градска општа болница. Воедно, Карадакоски бил во најтешка состојба од четворицата критични пациенти кои се лекуваат надвор од државата.

Директорот на Универзитетската клиника за хируршки болести „Свети Наум Охридски“ д-р Небојша Настов информираше дека Карадакоски бил примен во болницата околку 6 часот утрината после настанот во Кочани.

Во текот на денот доаѓа до влошување на неговата состојба и во попладневните часови има потреба од интубација односно истиот е веднаш поставен на апарати за вештачко дишење. Генерално се продолжува со неговиот интензивен третман и интензивно лекување и обработка на изгореници. Вкупната површина на изгореници е некаде околу 36% претежно во пределот на главата, вратот и горните екстремитети со длабочина од втор и трет степен. Пациентот по скоро 24 часа од самиот прием во болницата префрлен е во Литванија каде е продолжено со неговото лекување. Заради делот од чадот кој што го вдишал доаѓа до оштетување на внатрешните органи, што е потврдено и од медицинскиот персонал од Литванија. Утврдено е дека е оштетен голем дел од дишното стебло и како последица на тоа доаѓа до влошување на состојбата која на крај резултира со подлегнување на повредите, истакна Настов.

Министерот Таравари посочи дека на Карадакоски на први април му откажале и бубрезите и бил ставен на дијализа, имал температура, како и рани на телото, што отвора простор за појава на инфекции, дополнително на состојбата со изгореници и на дишните патишта.

Транспортот на телото на Карадакоски ќе биде организирано и целосно трошоците ќе бидат покриени, а обдукцијата ќе биде извршена на Судска медицина. Остануваат 78 пациенти од вкупно 193 пациенти кои беа повредени во несреќата во Кочани кои се лекуваат во болниците. Од нив во државата се 14 пациенти од кои 5 ќе бидат испишани и со тоа 9 пациенти остануваат во болниците во Скопје. Денес се враќаат и 6 пациенти кои се лекуваат надвор од државата, по двајца од Шпанија, Бугарија и Унгарија, кои се во стабилна состојба. Со тоа надвор од државата остануваат на лекување 69 пациенти, од кои 3 за жал сеуште се во критична состојба. Сите пациенти кои се лекуваат во Македонија се во добра и стабилна состојба, потенцираше Таравари.

Инаку, денес Основното јавно обвинителство Кочани информираше дека по прибавување на официјалната документација за настапената смртна околност на 60-та жртва од катастрофалниот пожар во Кочани, за лице кое претходно беше опфатено со наредбата за спроведување истражна постапка, во својство на управител на правно лице, ќе донесе наредба за запирање на истражната постапка.

Н.С.Ј.