Клучен за неуспехот во Унгарија, против последнопласираната екипа во Лигата, беше првото полувреме, што МЗТ го загуби со 28-41. Домаќините одиграа агресивно, добро во одбраната и ефикасно во нападот. Крилото на домаќините Бадер играше одлично и со 8 поени во првата четвртина ја растури одбраната на МЗТ. Разликата од 22-9 во корист на Шолнок по првите 10 минути, најави катастрофа на нашиот првак, но скопјани ги консолидираа редовите, одиграа егал во вториот период, 19-19, оставајќи простор за пресврт. Го најавија со серија од 12-4, на почетокот на второто полувреме и стасаа до негатива од само 5 поени.
Притисокот на МЗТ продолжи, со тројката на Кејд Дејвис стасавме до негатива од само еден поен, 56-57, но за жал комплетен пресврт не се случи. Геј и Флоренс со две тројки зголемија на 8 разлика на стартот од последниот период, што беше недостижно за МЗТ Скопје, иако завршните 10 минути им припаднаа на гостите со 20-13.
Триото Дејвис, Гечевски и Дамјан Стојановски дадоа по 15 поени и беа најефикасни во таборот на македонскиот шампион, а кај домаќините блескаше Бадер со 24 поени. Флоренс додаде 15 и тоа беа единствените двајца поединци кај Шолнок, со двоцифрен учинок во поени.
МЗТ Скопје останува на 8. позиција, со идентичен ефект на победи и порази, по 12, а во следното коло, на 16. март од 17, 30 часот ќе му биде домаќин на Партизан. Во последното 26. коло, македонскиот првак ќе и гостува на Крка.
