Полни раце работа имаа дежурните служби во Општата болница во Охрид за време на новогодишната ноќ. На одделенијата при Општата болница ноќеска се извршени повеќе од 60 медицински интервенции.
Најмногу интервенции имало во Дневната болница каде биле донесени 16 лица со акутно труење со алкохол, од кои повеќето малолетници.
На интерното одделение биле примени на третман и тројца пациенти со претпрпен срцев удар, а на неврологија четири лица со мозочен удар. За среќа, нема ниту еден смртен случај, ни изјави портпаролот на охридската болница, д-р Сашо Василески.
Тој истакна дека во општата болница синоќа било примено и едно лице кое најверојатно било прегазено од автомобил и оставено на улица. Лицето се наоѓа во шок соба и е надвор од животна опасност. Полни раце работа имало и хируршкото одделение каде биле примени 11 пациенти со повреди здобиени во тепачки, додаде д-р Василески.
Инаку, за дежурните во Службата за итна медицинска помош новогодишната ноќ минала вообичаено и без посериозни интервенции.
