Педесет годишниот јубилеј од возобнувањето на Охридската Архиепископија во лицето на Македонската Православна Црква, ќе биде одбележан со бројни црковни свечености кои викендов ќе се одржат во Охрид. Чествувањата ќе започнат со вечерна богослужба во манастирот „Свети Климент и Пантелејмон“ на Плаошник. Со богослужбата која започнува во 18.00 часот, ќе чиноначалствува неговото високопреосвештенство митрополитот Дебарско-кичевски г. Тимотеј со повеќемина свештенослужители.
По завршувањето на вечерната богослужба ќе се отслужи панихида за упокоениете учесници на Вториот Црковно-народен Собор, а вечерта во катедралниот храм „Света Софија“ ќе се одржи Свечена Академија по повод јубилејот. На свечената академија влезот е слободен и може на неа да присуствуваат сите заинтересирани граѓани.
На 5 октомври (недела), во катедралниот храм „Света Софија“, ќе се служи света архиерејска литургија, по повод празникот „Собор на сите македонски светители“, и по повод 50 годишниот јубилеј од возобнувањето на Охридската Архиепископија во лицето на Македонската православна црква. Со богослужбата која започнува во 9 часот, ќе чиноначалствува неговото блаженство Архиепископот Охридски и Македонски г. г. Стефан во сослужение со митрополитите на Светиот Архиерејски Синод на Македонската православна црква, како и со повеќемина свештенослужители.
