Со помош на Агенцијата за вработување, 20 охриѓани, успеале да земат поволни кредити и да започнат сопствен бизнис. Ова е дел од Програмата за самовработување со кредитирање, што Министерството за труд и социјална политика ја имаше предвидено за 2009 година, во рамки на Активните политики за вработување.
Од охридската агенција за вработување велат дека апликантите за оваа програма, биле обврзани да приложат бизнис план за реализација и да регистрираат фирма на свое име. Потоа овие документи биле разгледувани од посебна комисија на Министерството, која што одлучила кои од апликациите ќе се достават до банките.
– Кредитите кои ги зедоа апликантите, се со минимални камати, со една година грејс период и 3 години на отплата. За оваа програма имаше голем интерес и за неа се пријавија околу 40 невработени од Охридскиот регион. Интересот ќе беше многу поголем доколку можеа да се пријавуваат и невработените, кои во евиденцијата на АВРМ, се помалку од пет години.-велат од Агенцијата за вработување од Охрид.
Тие нагласуваат дека невработените охриѓани и во текот на оваа година, ќе имаат можност да аплицираат за Програмите за самовработување, кои ќе бидат дел од Активните политики за вработување во 2010-година.
