Во периодот од од 01.07.2009 год до 30.09.2009 година, Државниот инспекторат за транспорт при Министерството за транспорт извршил контрола на меѓуопштинскиот линиски и слободен превоз на патници, посебниот линиски превоз на патници, како и превозот на стока и патници во внатрешниот и меѓународниот сообраќај на различни локации во во земјата, на граничните премини Блаце, Делчево, Ќафасан и Табановце во заедничка соработка со Царинската управа и Граничната полиција, како и на автобуските станици во Македонија.
Изготвени биле вкупно 1245 записници за констатирани прекршувања на законските одредби од Законот за превоз во патниот сообраќај и Законот за јавни патишта, донесени се 532 решенија кои се во управна постапка, поднесени се 729 барања за поведување прекршочна постапка до надлежните судови, а од сообраќај се исклучени 91 возило кои извршувале недозволен меѓуопштински линиски превоз на патници.
При овие инспекциски контроли, во координација со Министерството за внатрешни работи, констатирано е неплаќање на надоместокот за користење на автопат кај вкупно 273 возила. На прекршителите им е изречена глоба во износ од 200 евра во денарска противвредност во согласност со Законот за јавни патишта, која треба да се плати во рок од 8 денови, а во спротивно се поднесува барање за поведување на прекршочна постапка. Спроведените контроли за плаќање на надоместокот за користење на автопат во овој период се на локации во близина на наплатните станици за патен надоместок за користење на автопат во Република Македонија.
